PSV星散冇料到

　　欧洲各地主要联赛啱啱先开番，欧联附加赛就有大牌球队对碰!今晚首回合荷甲班霸燕豪芬(PSV)喺主场硬撼意甲AC米兰，两回合晋级一队直入32强分组赛。主队超新星萨卡利亚巴卡利仲未100%肯定赶得切复出，但AC就有奇云保定担正，同艾沙拉维及巴洛迪利组成劲爆铁三角攻坚，信得过佢哋火力，可以直取2.52倍客胜。

　　(有线61及201、中央5台周三凌晨2:45直播)

　　年轻化嘅AC米兰近年喺欧联都有唔少闪亮表现，相反燕豪芬好似同欧联已经脱咗节咁，兼且呢个暑假又走咗大批主力，小弟认为AC米兰喺呢轮对决应该可以轻鬆晋级。事实上，AC近年换血做得唔错，巴洛迪利、艾沙拉维同奇云保定呢个进攻铁三角，有青春、有活力、有质素兼有卡士，近两季佢哋有过炒阿仙奴4球同赢巴塞隆拿2球嘅风光一页，即使最终都畀巴塞反胜踢出局，一样抵讚!

　　AC巴洛迪利伤愈回归

　　虽然佢哋今夏无特别增兵，但年轻班底亦几乎留低晒，预计合作性同成熟度会进一步提升，就算巴西前锋罗宾奴有伤，但王牌射手巴洛迪利康复回归，火力唔成问题。况且意甲呢个礼拜先开锣，AC可以集中精神寓赛于操，赢咗呢场为新季意甲壮胆都仲得，双赢呀!

　　燕豪芬唔经唔觉已经缺席欧联4个球季，就算转踢欧霸盃亦攞唔到咩成绩，个Background麻麻哋咋噃!最大剂係佢哋上季几个主要功臣，好似史杜特文、谢明兰斯同梅顿斯都已经齐齐离队，日前仲卖走埋巴西后防马些路安东尼奥，实力比起上季削弱咗唔少。

　　燕豪芬新星有伤顶硬上

　　本来佢哋今季打起咗个17岁比利时仔萨卡利亚巴卡利，可惜佢上星期喺国家队操练意外受伤，即使主帅高古睇好佢可以赶及伤愈复出，不过状态难免受影响囉。就算话佢哋今仗会有中场舒赫斯同防线主力列却克回归正选，但呢铺撞着7届冠军AC，凭咩去阻人哋晋级呀?

　　燕豪芬连开4场大

　　燕豪芬连续4场比赛开入球大。

　　燕豪芬近5场共入16球。

　　AC米兰近5场热身赛取得3胜2负。

　　顶占笋盘：AC米兰(客胜)