睇完欧联唔够喉?听朝仲有成堆南球盃同中北美冠军盃畀你过瘾!其中美职劲旅洛杉矶银河就会喺中北美冠军盃H组主场迎战哥斯达黎加球队卡达真尼斯，主队双星当路云同罗比坚尼近期轮流发威，状态Fit到震，今铺唔难大炒对手为出线铺路，1.85倍「让主」要捧。

　　(开赛时间：周三早上10:00)

　　罗比坚尼 当路云斗入波

　　呢个赛事每组3队只能出1队，前个星期分组赛首战，卡达真尼斯作客以4:2赢咗萨尔瓦多嘅梅塔帕，虽然话打双循环，但简单嚟讲，卡达真尼斯都会係银河争出线嘅主要对手，试问银河今仗点会唔搏命先?再者，银河对上一次捧盃已经係2000年嘅事，上季佢哋饮恨4强，家阵恨捧盃恨到发烧，斗志毋庸置疑。

　　睇番近绩，银河前日朝以4:2反胜皇家盐湖城，除咗伤愈复出嘅罗比坚尼大演帽子戏法係功臣外，取代古迪仙尼把关嘅巴拿马新兵门神宾尼度有水准演出亦係关键，预计今仗佢会继续担正。

　　至于前仗作客踢和FC达拉斯都连中三元嘅当路云，同样状态十足，银河火力绝对超班，要炒起有哥斯达黎加国脚前锋艾历克史葛因为冇签证未能披甲，以及箭头兰斯简奴缺阵嘅卡达真尼斯，真係话咁易啦!