韦拿倒戈畀巴塞捉晒路

　　西甲开咧战重现梦3年代超级霸气嘅巴塞隆拿，今晚喺西班牙超级盃首回合作客硬撼马德里体育会，淨係一个美斯继续孭飞，已经炒得起对手有馀。唔係讲笑，美斯球员生涯入球无数，但原来攻入最多嘅大门正正係马体会，有成20球之多，对住呢个私人出气袋，巴塞要赢波自然话咁易，1.52倍客胜够晒稳阵啦!(now632台周四清晨5:00直播)

　　巴塞喺开咧战大胜利云特7蛋，半场已经入咗6粒，换边后收缰只入1球，如果全力搏杀，真係炒够双位数都有可能。「地上最强」能够重现光芒，交出2入波同1助攻嘅美斯当然居功至伟，上仗佢踢咗70分钟就退下火线，摆明留力今场。最紧要係佢对住马体会咁有入波心得，加上依家成班波都咁Fit，就算作客都冇有怕啦!

　　马天奴新战术劲 施蒙尼投降

　　值得一讚嘅除咗美斯，其实仲有新帅马天奴，《每日体育报》寻日分析巴塞创出史上最佳开咧战赛果嘅背后原因，就认为要多得马帅嘅新战术。有睇过当晚场波都知，相比起上季多用两闸落底，美斯係多咗返落去中场校炮，造就队友有更多空位插上。而且球队更多嘅前场紧迫，令对手难以组织攻势，更多嘅长传亦令一向踢小组进攻嘅佢哋战术变化增加。事实上，包括法比加斯同阿历斯山齐士等，喺马天奴手下都有翻生迹象，呢个阿根廷名帅真係有料，难怪马体会主帅施蒙尼寻日都发表投降宣言，承认巴塞同皇马喺西甲根本超晒班。

　　「地上最强」对赛6连胜

　　讲番人脚，上仗做后备嘅包括恩尼斯达同佐迪艾巴等，都会轮换担正。至于当日踢咗25分钟嘅尼马，马天奴叫大家唔好心急，好快就会见到佢同美斯有更多合作，但依家会畀佢慢慢适应先，睇怕今仗会先任后备，但「地上最强」实力够杀有馀，挟住对赛6连胜出击，「依丝W」啦!

　　马体会呢边，开咧战赢西维尔3:1，前锋迪亚高哥斯达梅开二度，新兵韦拿都有1球进帐。冇错，呢对星级组合实力当然唔简单，不过倒戈出战嘅韦拿，踢法相信已经畀巴塞兵睇熟晒，单靠迪亚高哥斯达或会孤掌难鸣。仲有，马体会防中堤亚高文迪斯之前受伤，季前赛冇踢足，状态麻麻，今仗搵佢去守巴塞，小心搓死冇命赔呀!

　　对赛208场平均入3.4球

　　双方近15次交手均开入球大。

　　马体会连续3季联赛主场均以1:2不敌巴塞。

　　连热身赛计，巴塞近6战均开半场入球大。

　　双方于西超盃曾经交手10次，马体会只係试过响1985年胜出。

　　今场係两队第209次较量，喺以前208场对碰，总共产生729个入球，平均每场入3.4球。

　　西超盃赛制

　　採主客两回合制，现为决赛首回合。若两回合打和，会计算作客入球优惠，未分胜负将于次回合法定时间后加时30分钟，加时仍计算作客入球优惠，再和则互射12码决胜。