兵工厂伤兵成箩学人让波

　　欧联附加赛首回合今晚由费伦巴治主场对阿仙奴孭飞，个人嚟讲，我都唔希望兵工厂被踢出欧联，不过佢哋伤兵成箩，甚至话正选11人阵容都未必凑得齐，加上传出领队云格又启动「乱买人模式」，进一步打击士气，作客让平半，不如博费伦巴治1.72倍下盘。(有线61、201周四凌晨2:45直播)

　　阿仙奴原本话有7,000万镑可以扩军，点知最后买唔成利物浦射手苏亚雷斯，新球员只得免转会费签入嘅欧塞尔前锋耶耶辛洛高，即係转会市场上斗零都冇用过，难怪厂迷要胁再唔使钱就发起抗议，尤其经过开咧战先开纪录、最终反以1:3惨负阿士东维拉嘅打击，据讲领队云格会再次展开求其买人行动，是但买几个球员向球迷交差。

　　云格增兵临急抱佛脚

　　记得前年兵工厂又係唔掂，搞到匆匆忙忙趁转会市场关闭前扫入中场阿迪达、班拿约、后衞梅迪萨卡同安德里山度士，结果得阿迪达啱用，今次佢哋又有大把目标，但无论最后收购咩人，都肯定唔係厂迷等紧嘅巨星级球员，而且咁搞法，好容易令阿仙奴球员觉得自己即将失去正选位置，大战当前仲要咁多嘢谂，想踢好波都难!

　　最惨就係，日前兵工厂对维拉再伤几件，包括翼锋阿历士张伯伦重伤可能抖半年，残阵出战输埋都唔出奇，特别係对家费伦巴治今季阵容冇大变，仲加入辛尼特中坚般奴艾维斯同利华古逊左闸卡特历，何况前锋古积特、中场鲁尔梅利斯同中坚尤保全部踢过英超，熟晒阿仙奴锺意歎慢板嘅路数，首回合要开下盘抢分真係唔难。