丧烧16.2亿增兵顶巴利

　　欧霸盃附加赛首回合今晚连环爆发，格鲁吉亚嘅第比利斯戴拿模喺主场对英超嘅热刺，注定冇运行。热刺预见卖走加里夫巴利后大把钱，今夏係咁买人顶佢个位，总使费随时有成16.2亿港元，烧钱烧得仲劲过曼城，唔入欧霸盃分组赛帮补吓点得呀?热刺实力超晒班一于捧2.1倍「让客」。(开赛时间：周五凌晨0:00)

　　热刺将肯搏又实用嘅柏加卖到富咸，老实讲几令我意外，但原来领队保亚斯已谂定点换血，啱啱就签入巴西球星韦利安，跟住又话想买埋罗马前锋拉美拿，今夏转会使费随时高达1.33亿镑(约16.2亿港元)。虽然韦利安今晚唔会落场，但好似基菲尔施古臣、迪比利同贺治比等中场唔想冇碇企嘅话，依家就梗係搏命争取表现啦!

　　争入欧霸分组赛赚钱帮补

　　英国传媒话，保亚斯食错药式疯狂买人，原因係高层已经倾好以「癫价」出售加里夫巴利去皇家马德里，但保亚斯依家不顾一切烧钱，当然係有信心杀入欧霸盃分组赛搵钱帮补吓，确保热刺财政健康啦，否则抽到上上籤都晋唔到级，就真係好难向董事局交代，况且热刺依家成箩球星，捧埋隻欧霸盃就更加威水啦!

　　格鲁吉亚班霸外援冇料到

　　对家第比利斯戴拿模係格鲁吉亚最成功球会，上季重夺联赛冠军，仲喺1981年攞过停办咗嘅欧洲盃赛冠军盃冠军，都算风光过。问题係，第比利斯戴拿模家阵得两个西班牙外援，同样効力过贝迪斯嘅中场悉斯高同后衞乌斯达列斯见得吓人，今季最昂贵收购只係价值25万欧元，AEL利马素嘅科特迪瓦前锋禾豪，财力蚊髀同牛髀，边似爆得出呀?

　　欧霸盃赛制

　　採主客两回合制，现为附加赛首回合。若两回合计打和，计算作客入球优惠，未分胜负将于次回合法定时间后加时30分钟，加时阶段仍计算作客入球优惠，再和则互射12码决胜。