今晚荷甲独脚戏，海伦芬主场迎击阿积士，双方教头云巴士顿同法兰迪保亚嘅荷兰名宿对决固然吸引，但千祈咪错过场上嘅「冰岛内讧」，冰岛双箭艾费特芬保加臣与史基贺臣近期状态弗爆，今场二人各为其主，精彩「大」战蓄势待发，中位数调至3.5球1.88倍入球大照捧可也。

　　(now670及672台周六凌晨2:00直播)

　　冰岛双箭劲入波

　　海伦芬喺荷甲开咧两连胜后，上场虽然走样惨负荷华高斯，好在对箭头艾费特芬保加臣全无影响，3场夹埋入咗4球之外，醒神演出更吸引些路迪同奥格斯堡出价抢购，可惜由于价钱唔啱令交易拉倒。相信佢嚟紧都会趁转会窗仲未闩，尽骚哥利向班「准买家」证明自己物超所值。况且海伦芬喺主场锺意大踢性感足球，今季踢咗2场就有12球交收，今场唔使怕冇波入。

　　作客嘅阿积士有中场施安迪庄日前因气胸问题，入院接受治疗后证实抖6个星期，不过有基斯甸艾历臣担任指挥官角色，组织攻势依然流畅。最重要係射手史基贺臣继荷超盃入波后，上场斗飞燕诺梅开二度，成功喺联赛开斋之馀，协助球队喺呢场传统打吡反胜对手，令信心及士气激增，今场继续有域陀费斯查同保赞两翼侧击，史基贺臣肯定大把入波「餐士」。