今晚西甲有毕尔包主场斗奥沙辛拿，虽然主队上季表现走晒样，但两名「叛徒」查维马天尼斯及洛兰迪已离队，再换上新帅华维迪后有望令球队表现更稳定，就算场波要改去皇苏个主场举行，佢哋要赢奥沙辛拿都唔係难事，一于敲1.58倍主胜。

　　(开赛时间：周六凌晨4:00)

　　球场未掂 改用皇苏主场

　　毕尔包个新圣马美斯球场因为工程未搞掂，预计要到9月15日对切尔达先可以正式启用，因此今场波佢哋要问最近嘅皇苏借场开波。讲番队波，毕尔包依家同两季前嗰队欧霸盃决赛分子相比已经面目全非，但新人事新作风反而令佢哋搵到一线生机!前任教练「狂人」比尔沙太倚重查维马天尼斯同洛兰迪，结果两位主力分别离队及坐冷板后，球队随即陷入崩溃。

　　今季华维迪回归掌帅虽然未令「雄狮」即刻回复两季前嘅勇勐，但就令实力更见平衡，上季状态一度低迷嘅蒙尼恩喺开咧战已经开斋，加上成功由格兰纳达挖走中场主将米基尔列高，配合原有嘅射手阿度里斯同马高苏沙亚达，喺主场出击绝对有力轰散奥沙辛拿防线。

　　奥沙辛拿一开咧就喺主场输畀上季要齐齐护级嘅格兰纳达，佢哋唔止将主力射手安历基苏拿放咗畀今仗对手毕尔包，更大镬嘅係正选右翼艾华路施祖度受咗伤唔出得，火力进一步打折扣，想入番粒都难。