伤兵成箩「替工」沙格拿踢中坚

　　饱受内忧外患困扰嘅阿仙奴，周中欧联赢波后，今晚英超又要喺伦敦打吡作客富咸，随时又会再失分。唔係力奇泼佢哋冷水，只係伤兵纍纍嘅兵工厂今场有中坚哥斯尼停赛，要搵右闸沙格拿做替工顶住中间，防线信唔过仲点让波?捧1.75倍「让主」!

　　(now621台、广东体育周六晚7:45直播)

　　华美伦打柴 哥斯尼停赛

　　阿仙奴上周开锣战1:3反输畀阿士东维拉，震动全英超，领队云格成为众矢之的，话佢又一个暑假买人不力，班波完全唔够料争标。好衰唔衰，队波近排仲要黑气缠身，伤完一个又一个，队长华美伦、中场戴亚比同阿迪达早喺季前赛已经缺阵，新星阿历士张伯伦又喺对维拉之战膝部重创要抖半年。到周中欧联附加赛对费伦巴治，再有哥斯尼畀对手踢爆头，虽然事后证实伤势唔严重，可惜呢位法国中坚今晚要坐波监，点都係唔出得。

　　后防闹兵荒，华美伦同哥斯尼齐齐休战，云格中坚位就剩番个德国长人梅迪萨卡，上仗对费伦巴治中途就搵右闸沙格拿顶上，对住呢支火力平平嘅土耳其球队当然冇问题，照赢3粒冇失波，不过今晚对富咸仲守唔守得住，真係难讲。

　　柏加登场 富咸升呢

　　主队富咸喺名帅祖尔领导下，开锣战对新特兰踢出完美稳守突击战术，即使全场只得4成控球权，射门次数係5:21之比大落后，只得一次攻门中框就凭卡沙米一箭定江山全取3分。冇错，富咸今仗有左闸基兰李察臣同门将史基伦堡因伤要上壁上观，但中场有新加盟英格兰国脚柏加首演，呢位前热刺球星踢惯伦敦打吡肯定唔怕压力，能攻擅守嘅佢必大大提升队波嘅攻守能力。

　　至于前线除咗有「潇洒哥」贝碧托夫孭飞，后备席仲有由维拉外借嘅戴伦宾特候命，呢位29岁英格兰边缘国脚原来係厂仔剋星，近8次对阿仙奴入咗6球之多，考虑埋富咸近5次对住兵工厂只输过1次，今晚莫讲话攞1分，偷鸡赢埋都唔出奇呀!

　　交手往绩旺开大

　　连季前热身赛，兵工厂连续9场入波。

　　阿仙奴连续6次对富咸都有波入。

　　两军近6次交手，有4场开入球大。

　　两队够「火」捧埋入球大

　　富咸今季借入射手戴伦宾特、中场泰拉拔，配合传送同射术都咁出色嘅前锋贝碧托夫，火力提升唔少。对方射手基奥特上场联赛已经开斋，配合翼锋禾确特、中场辛迪卡索拉等人，攻击力有保证。但係佢哋今场后防冇咗哥斯尼同华美伦呢对中坚，随时由甩漏唔少嘅沙格拿顶上，好难可以保持清白身，1.75倍入球大值得支持。