两队Big 4利物浦同阿仙奴上周英超开锣日同样主场出击，但命运截然不同。红军虽则仅胜，中前场组织却颇见生气，伊亚高艾斯巴斯、史杜列治同菲腊比古天奴嘅进攻铁三角亦见流畅，今年成绩应有进步。兵工厂倚重原有班底，热身赛成绩又对办，而且云格开季前嘅豪情壮语「最强之人已喺阵中」，令人期望不断提高，谁知最终1:3不敌维拉。有球迷认为佢哋衰在留力欧联附加赛，但亦反映板櫈深度不足兼伤兵成箩，云格係时候大破悭囊，为球队、为自己尽地一煲。

　　艾尔切撼皇苏难抢分

　　维拉开季有个魔鬼赛程，两周内连对三支Big 4劲旅，偶一不慎随时重演上季开季噩梦。幸好维拉令人喜出望外，就算周中输畀车仔多少同球证误判有关，形势唔差，前锋宾迪基愈来愈有希斯基影子，今晚首度主场出击，有力冲击后防唔多稳阵嘅利物浦。

　　(now621台周日凌晨0:30直播)

　　至于富咸亦係上周另一支令人惊喜球队，打法并不悦目但异常务实，尤其守将轩治兰特及艾朗晓士，係现役搭档最耐嘅中坚，配合工兵型中场新兵柏加，今晚或又令阿仙奴吃尽苦头。

　　(now621台周六晚7:45直播)

　　同晚，西甲亦有升班马艾尔切主场出击，佢哋上场初到甲组就不敌华历简奴，今晚对住喺欧联附加赛杀败里昂嘅皇苏，睇怕难逃一劫，抢分等下礼拜啦!

　　(now632台周日凌晨1:00直播)