唔少人都睇死阿士东维拉，皆因佢哋头3战就要面对阿仙奴、车路士同利物浦。点知呢班细路一啲都唔失礼，今晚佢哋返主场斗利物浦，有力坐和望赢，受让撑1.88倍「让球主胜」。

　　(now621台及广东体育周日凌晨0:30直播)

　　利物浦冇哨牙苏始终争啲

　　「维拉BB」首战反胜兵工厂尽显斗志，第二场对住车仔，如果唔係球证鬆手冇赶伊云洛域出场，维拉至少执番1分。点都好，经过上季护级嘅磨练后，维拉成队波升晒呢，尤其係佢哋成功留住宾迪基，呢位比利时前锋2场波已轰入3球，状态弗到漏，锋力够晒保证。

　　对家利物浦虽然买咗唔少新兵，但冇咗停赛射手苏亚雷斯喺前线，把握力始终都係差啲。最大镬係佢哋条防线成日犯错，上仗对史笃城就有中坚丹尼尔艾格犯天条，好彩门将米洛列特救出12码先勉强保住胜局，真係睇见都觉得牙烟!