今晚西甲第2轮赛事，重返甲组嘅维拉利尔会喺主场迎战华拉度列，「黄色潜艇」上星期重返西甲第一击随即敲响胜鼓，新加盟嘅墨西哥国脚杜斯山度士又入波又助攻尽显身价，家阵班波士气大振，返到主场有力再下一城，3倍「让球主胜」又点可以错过呀?

　　(开赛时间：周日清晨5:00)

　　墨西哥孖宝有料到

　　维拉利尔喺西乙短短「休息」咗一季后，立即重返甲组战场，一班跟随球会降落西乙嘅球星，好似卡尼、般奴苏利安奴等绝对功不可没。同时，今季由马略卡加盟嘅墨西哥国脚杜斯山度士亦重振雄风，踢番当年出道被喻为「新细哨」嘅水准，配合由「黄色潜艇」回收返嚟嘅查维亚阿基路，呢对「墨西哥丧攻孖宝」又年轻又有脚法，加上佢哋同声同气兼老友鬼鬼，默契一流，绝对係维拉利尔今季最煞食嘅武器，今晚「张峰」睇好佢哋可以再次合力炮製士哥。

　　对家华拉度列今季变动唔算太大，查维亚古艾拿、艾拔同奥斯卡干沙里斯等好波之人留效，中前场人脚尚算完整。不过上季有唔错表现嘅门将丹尼靴南迪斯同后衞白兰斯奥加离队，始终对防线有一定影响，首轮主场1:2输畀毕尔包就係一个警号，睇嚟今季由利云特来投嘅新帅桑马天尼斯，真係要喺后防方面花啲心思喇。