巴塞「-2」照开W

　　今晚西甲会上演马拉加主场迎战巴塞隆拿嘅赛事，客军虽然有「球王」美斯因伤冇随军，但仍有人气王尼马担正孭飞，配合埋要力保正选位置嘅法比加斯，就算作客都有力轰散面目全非嘅马拉加，让到2粒照捧2.48倍「让客」啦!(now632台及广东体育周一凌晨3:00直播)

　　西班牙《体育报》话喺上场西超盃受伤嘅美斯寻日都未复操，今场唔踢得，不过球迷唔使担心嘅，正如主力丹尼尔所讲，即使劲到好似法拉利呢啲超级靓车，间唔中都要整吓啦，美斯抖抖「修理」一下好正常。消息指马天奴将起用法比加斯「扮假9」踢箭头，即係话想睇「美斯x尼马」呢个组合嘅球迷们要等下次。

　　两件衞将受伤 马拉加散晒

　　不过，小妹并唔担心「地上最强」嘅火力会受太大影响，首先喺上仗对马体会射入扳平一球成为「救世主」嘅尼马，已经同队友愈夹愈好，至于今夏曾受转会传闻困扰嘅法比仔喺开季首两战亦都踢得特别有火，似乎係要证明自己有能力喺球队稳佔正选，相信两支箭头都会趁「球王」唔喺度时争取表现，唔入多几粒又点得先?

　　「家道中落」嘅马拉加上季虽然有好表现，但随住主力艾斯高离队、上季喺财困下「化腐朽为神奇」嘅教头比历连尼转投曼城，以及杜拿兰、祖亚昆、沙维奥拿、迪米捷利斯等走人后，队波基本上已经散晒，前线得番老将辛达告鲁斯担大旗，中后场亦只得番一班二线兵，今场仲要有法维奥费拉拿、维列顿两件守得之人倦勤，即使波兰前锋巴奴斯基赶及注册落得场，对住「地上最强」都係输少当赢啦。