意超盃丧吞完祖云达斯4蛋，拉素今晚展开意甲之旅当然想踢场好波博翻身，呢支首都球队今季阵容冇乜大变，默契同实力都得以保持，以佢哋去季主场近6成嘅最先入球率嚟睇，今晚想率先撕破有欧战后顾忧虑嘅乌甸尼斯大门唔难，1.62倍第一队入球捧得过。(开赛时间：周一凌晨2:45)

　　迪拿达利穿头缝5针顶硬上

　　由于有球迷喺意超盃向祖云达斯球员作种族歧视，意足总判罚拉素嘅奥林匹高球场北看台今仗封闭，係就係少咗Fans支持，但照计唔会影响佢哋争胜本钱。睇番意超盃场波嘅数据，拉素射门次数比「斑马兵团」更多，输到咁大镬全因后防唔稳，教练柏高域前日就表明，今战会安排艾华路干沙利斯担正协防，稳住个后防再谂进攻，有晒作战策略吖!

　　其实睇好拉素先入波，除咗因为佢哋上季意甲主场试过11次先开纪录之外，乌甸分心欧战都係重大因素，呢班波啱啱喺欧霸盃附加赛以1:3输畀利巴域，仲有迪拿达利撞穿头要缝5针，今仗要夹硬带伤披甲，不过佢哋上季几经辛苦先攞到欧战入场券，嚟紧周五凌晨嘅次回合肯定想绝地反击，教练古度连今晚收起部分主力一啲都唔奇。睇埋双方近5次喺奥林匹高交手战绩，原来拉素有4次先入波，咁好路冇理由唔捧拉素啫!