云格撬牆脚 两主力Hea踢

　　今夏转会窗喺9月2号先关闭，唔少球会都尽最后努力增兵，其中史云斯两件主力米捷同艾殊利威廉斯，近排就成为阿仙奴嘅收购目标，搞到佢哋唔多专心，斋睇「天鹅」喺上轮英超有主场之利，都可以大败畀今非昔比嘅曼联1:4，今晚作客热刺，小妹对佢哋冇晒信心，都係捧1.53倍主胜稳阵!

　　史云斯喺季前热身赛同欧霸盃附加赛表现得好好，但自从传出阿仙奴领队云格想出手撬米捷同艾殊利威廉斯后，一开咧遇上曼联就即刻露底，全场畀人揿住嚟砌之馀，条防线仲甩甩漏漏，除咗话艾殊利威廉斯心不在焉，就连守将捷高同门将禾姆，亦一样犯错，任红魔前线孖宝尹佩斯同韦碧克予取予携，谂番上季佢哋一鸣惊人，突然间走晒样，真係觉得好鬼阴功。

　　史云斯遇强即见底

　　防线唔掂，锋线嘅表现亦唔好得去边，上季连盃赛上阵43场攻入22球嘅米捷，对住曼联成场波都无神无气，反而后备入替嘅荷甲神射手韦菲特邦尼喺下半场先帮史云斯破蛋，可见米捷真係有啲嘢咁喎。係，虽然「天鹅」喺上周中欧霸盃炒咗比杜路尔一铺，不过呢支罗马尼亚球队实力根本唔可以作准，大家咪畀佢哋呃到呀!

　　苏尔达杜开咧2战都入波

　　另边厢，热刺啱啱都係喺欧霸盃大捷，仲叻到作客5:0炒起第比利斯戴拿模添，连埋上轮联赛1:0赢水晶宫，新兵苏尔达杜2战都有入球，真係有料到o架。呢位射手之前受访，讲明自己今季嘅目标係至少入20球，小妹相信今晚呢位西班牙射手喺自己地头，一定会表现得更加出色。最重要係热刺近2季喺英超4斗「白天鹅」，当中有3次赢波，优势一面倒，今晚梗係再追主胜啦!