史特加追打「黑仔穷鬼」

　　开咧后同样两战两败嘅奥格斯堡同史特加，今晚正面碰头斗快反弹，阿占就睇好作客嘅史特加至少唔使输。始终呢支上季德国盃亚军劲旅，开季要分心欧霸盃，但佢哋嘅整体表现其实唔差，只係把握力同运气一般先落得咁嘅局面，论质素，史特加当然高过奥格斯堡啦，衰不过三，今晚史特加受让，几大都撑1.65倍「让客」。(有线61、64、201及203、中央5台周日晚11:30直播)

　　奥堡2连败 「救星」打埋柴

　　奥格斯堡上季仅仅护级成功，呢间财力相当有限嘅球会，早前以75万欧元「重金礼聘」嘅阿根廷前锋波巴迪拿，上星期后备落场首演即刻被踢伤膝头，唔单止今晚无缘上阵，教练韦恩薛亚更证实呢位射手有排抖，真係黑过墨斗!奥格斯堡本身实力已经唔多够，家阵连「救星」都话打埋柴，相信短期内都要继续输波喇。

　　对面嘅史特加虽然输咗头两场波，但上仗对住劲旅利华古逊只係仅失一球乌龙波，而且首仗对缅恩斯力战仅败，其实表现真係唔算太曳。佢哋呢两场波更加製造咗唔少埋门机会，夏历同伊比斯域呢对箭头见惯大场面，始终有一定质素，回复状态相信只係时间问题，今场对住奥格斯堡就係争番信心嘅最好机会喇。

　　顶占笋盘：史特加(让球客胜)