今晚西甲尾场，由贝迪斯喺地头迎战切尔达。首轮贝迪斯作客皇马表现并唔失礼，喺领先一球嘅情况下仅以1:2落败，如果把握力再好番啲，相信最少可以拎走一分。点都好，今晚佢哋回师主场，赢面点都大啲，加上对手只係由季前热身赛到上周都未赢过波嘅切尔达，贝迪斯好大机会喺球迷面前威番铺，1.63倍主胜够晒稳阵，唔好嫌奀呀!(开赛时间：周一清晨5:00)

　　安历基风格适应需时

　　贝迪斯周中喺欧霸盃外围赛报捷，士气正盛，虽然上季中场核心班纳特离咗队，不过取而代之有爱斯宾奴来投嘅好波之人祖安华度，相信问题已经解决。值得留意嘅係中场黑人球员施迪克，上仗佢对皇马频频利用高速产生唔少威胁，更助攻畀前线嘅佐治摩连拿开斋，今晚只要佢同祖安华度及鲁宾卡斯度发挥正常水准，要入一、两粒根本冇难度。

　　对家切尔达今季由名将安历基接手后，成队波一改以往保守作风玩主攻，踢进攻足球唔係唔好，只係适应需时啫，所以咪搞到一直都赢唔到波囉，上周喺主场一度领先两球係威係势，可惜就係太过进取，最终惨被爱斯宾奴逼和2:2，对士气肯定构成一定影响，今场作客具备一定实力嘅贝迪斯，情况好唔乐观囉。