边个未衰过?衰唔紧要，唔好衰到贴地就得喇!2006至2008年连夺3季巴甲冠军嘅圣保罗，对上4季已沦为陪跑分子，今季班球员仲好似唔识赢波咁，14战只得2胜5和7负得11分，最大剂係佢哋连续12场巴甲未赢过，差3场就可以追平「巴甲最屎」连续15场不胜嘅纪录，老大哥门将罗渣里奥赛前鼓励队友，话唔想「破纪录」就生生性性，早日赢波止颓风，难得今场到访嘅富明尼斯近况同样麻麻，又有巴西盃后顾之忧，让平半嘅圣保罗博得过啦!(开赛时间：周一凌晨3:00)

　　罗渣里奥开腔鼓励队友

　　随住富明尼斯同哥连泰斯等传统劲旅再次崛起，圣保罗呢几年都冇乜点威过，精神领袖、今年1月满咗40岁嘅「门神射手」罗渣里奥，喺接受巴西传媒访问嗰阵，就话自己职业生涯破过无数纪录，包括为圣保罗上阵1,000场，同埋射入100球等等，但就点都唔想球队喺佢仲係首席门将嘅情况下，连最丑死鬼嘅「最长不胜纪录」都破埋：「我同意教练所讲，成队波陷入信心危机，但我希望各位队友扚起心肝，踢好每一场比赛，其他事上帝会为我哋安排。」目前巴甲「最长不胜纪录」由圣卡坦奴同阿美利加纳泰，分别喺2006年同2007年球季创下，咁啱呢两季巴甲盟主都係圣保罗。

　　点解「四眼哥」会撑圣保罗呢?係，虽然圣保罗啲射手好似路尔斯法比安奴咁冇料到，但防守其实唔太屎，近两战都和到帕拉尼恩斯同法林明高，表现唔係想像中咁衰。难得今铺主场出击，迎战近况唔好得几多，兼且三日后有场巴西盃次回合，要作客戈亚斯跟尾嘅富明尼斯，仲唔博埋条老命求赢呀?而且圣保罗近绩衰到咁都仲要让波，就反映庄家都防佢哋会反弹啦!