巴黎圣日耳门(PSG)今夏好高调咁抢走乌拉圭中锋卡云尼，令球迷都期待呢位射手同瑞典前锋伊巴谦莫域组成嘅恐怖锋线。点知PSG雷声大、雨点小，连续2场联赛只係入得1球，至今仲未打开胜利之门。佢哋今仗作客南特想3分落袋问题唔大，但就难言狂数对手，1.75倍「入球细」谂得过!(开赛时间︰周一凌晨3:00)

　　南特防中维列度复出

　　虽然PSG今季有卡云尼过档，又有法国主帅白兰斯执掌教鞭，不过将帅之间点都需要一段时间磨合。佢哋连续两场比赛喺先失波嘅情况下逼和对手，就知呢班波仍处于适应期，冇咩大胜本钱。

　　由于中场马度迪伤愈有望复出，而且又有签咗新约嘅队长堤亚高施华坐镇后防，呢支班霸足以应付南特火力。讲实力PSG明显高过对手，但要留意佢哋依家只係想赢波攞足3分，冇需要大炒一场，随时入咗波之后为保胜局就变得不思进取。

　　南特自知牌面较差，就算今晚喺主场出击都肯定唔会斗攻，相信都係叠埋心水摆个「铁桶阵」出嚟死守，输少当赢。况且佢哋今场有法国U20世青盃冠军成员防守中场维列度刑满复出，进一步提升扫荡能力，PSG唔似咁易炒得起南特囉。