朗尼担正 争气凼队友

　　「魔童」回归撼车仔!今晚英超将会上演超重量级大战，由莫耶斯领军嘅红魔，喺主场迎战有「寸王」揸旗嘅车路士，肯定好睇过戏!今场波嘅焦点，除咗「双莫对决」，当然仲有「寸王」力斟嘅朗尼担正「鍊车」啦!家阵出走不成嘅「魔童」为咗争取上阵机会，今晚肯定会搏命同拍档尹佩斯做番场「拆车骚」，曼联小让平半，2.04倍上盘抵玩!(now621台及广东体育周二凌晨3:00直播)

　　朗尼为咗「上车」，扭计扭足成个暑假，搞到神憎鬼厌，班队友同球迷一早就睇佢唔顺眼，正当「魔童」以为奸计得逞嗰阵，车路士突然玩嘢爱理不理咁，家阵仲转軚话会买伊度奥，跣到「魔童」摊摊腰，亦即係话，呢位英格兰射手好大机会要留多一季先走人，唔想今年过得辛苦，兼且向玩嘢嘅车仔报复，呢场波当然要做番啲嘢啦!红魔阿头莫耶斯都相当识做，喺赛前记招事先张扬会派朗尼踢正选，仲话佢应承球迷会做足100分，摆明係要佢用场上表现证明自己啫!

　　尹佩斯开季2战入4粒

　　咁讲真，论星味，小妹觉得红魔肯定及唔上车路士，但红魔除咗有斗心超劲嘅朗尼孭飞，仲有至叻「单天保至尊」嘅尹佩斯担大旗!呢位荷兰神箭2场波已经入咗4粒，状态比上季仲要弗，配合今季升呢唔再做废柴嘅韦碧克，上仗都有2球进帐，呢个进攻组合绝对称得上係无坚不摧，今晚回师喺上季英超赢足16场嘅奥脱福出战，想射爆有大衞雷斯缺阵嘅「蓝战士」，绝对唔难囉!

　　马达冇态 车仔锋力跌Watt

　　当然，小妹唔係怀疑莫连奴嘅功力，但车仔喺佢带领下嘅首两场英超，表现唔算出色，特别係锋线嘅把握力明显不及上季，除咗啱啱伤愈嘅桑马达被传走人，搞到状态低沉之外，费托亦表现唔到「刽子手」本色，新星卢卡古又未算十分抢镜，所以「蓝战士」上仗对维拉，咪又係要靠后衞伊云洛域入波先赢到囉!今晚造访奥脱福，想唔输都难啦!

　　Data King

　　尹佩斯入波现役一哥

　　两军近6次喺曼联主场对赛，有5次开入球大。

　　尹佩斯开咧两战入4球，自2011年1月至今已经喺英超射入76球，数量係联赛现役第1。