今晚西甲独脚戏值得大家捱眼瞓捧场，CF格兰纳达喺主场对皇家马德里，受让1/1.5球随时爆得出。随住加里夫巴利「登舰」在即，现时皇马可以话人心惶惶，除咗C朗，个个攻击球员都可能入雪柜甚至被踢走，加上队长卡斯拿斯唔满意做后备，士气劲曳，冷敲格兰纳达下盘好过!(now632台周二凌晨3:00直播)

　　到底加里夫巴利係咪可以带起皇马，暂时仲未知，不过佢得唔到队友支持几乎可以肯定。梗係啦，天文数字转会费有边个唔眼红?而且最近有消息话，奥斯尔、迪马利亚同卡卡已经成为皇马清洗目标，突然被球会捨弃同背叛嘅感觉，真係非常恶顶，好难相信皇马球星可以喺呢一刻专心踢波。

　　格军上季曾击沉「舰队」

　　咁当然，皇马喺新教练安察洛堤嘅带领下，热身赛表现唔曳，但咁又点?开咧战咪又係仅仅赢贝迪斯2:1，要求作风保守嘅意大利教头领军连场大胜，似乎唔实际。更何况，据讲卡斯拿斯唔满意坐冷板，以佢喺皇马更衣室嘅影响力，肯定会影响班队友对肥安嘅信任，淨係靠C朗搏命，唔似可以轻易炒起对手喎!另一方面，格兰纳达上季喺联赛排第15位，但咪以为佢哋好虾，实际上佢哋喺主场相当恶，上季联赛主场唯一大败係以1:5不敌贝迪斯，其馀18场未输多过1球，包括以1:0打沉皇马、1:2不敌巴塞，受让1/1.5球的确有条件开下盘。