拜仁发火 剷平弗赖堡

　　德甲今晚有好戏睇，弗赖堡主场对拜仁慕尼黑，唔似爆得出。虽然拜仁开季后未有想像中咁屈机，不过为咗保持球员嘅战意，据讲教练哥迪奥拿落晒柯打Hold住阵中主力嘅续约谈判，即係有货交至可以留低，咁嘅情况热捧拜仁1.54倍「让球客胜」有着数。(有线61、64、201及203周三凌晨0:30直播)

　　艾简达拿膝伤抖7周

　　拜仁上季已经係「3冠王」，加埋「地上最强」教头哥迪奥拿，应该天下无敌至係，不过佢哋喺德超盃惨负多蒙特，之后踢德国盃同德甲，都唔见得特别有霸气，日前主场以2:0砌低纽伦堡，安联球场拥趸当然唔收货。不过哥迪奥拿始终觉得，佢嘅单防守中场阵式，好快就会发挥到巴塞式嘅屈机威力，希望球迷耐心等吓喎!

　　或者觉得手下班主力未交足货，原本拜仁高层同洛宾、却奥斯、谢路美保定同阿拉巴倾紧续约，听闻已经暂时嗌停，原因係哥迪奥拿要多啲时间去决定边个值得留低，顺便令更衣室有更好嘅竞争气氛，所以听佢讲延迟续约谈判，确保落场球员唔会Hea踢。撞啱上轮联赛佢哋又有新兵堤亚高艾简达拿右膝韧带受创，宣布要做手术抖7星期，依家正好係一众球员博表现争续新约嘅好机会，难怪成29岁人嘅洛宾近排都踢得特别肉紧啦!

　　弗赖堡「拆骨」唔多掂

　　弗赖堡今季好唔掂，日前作客以3:3打和贺芬咸已经算係代表作，主要原因当然係主力阵容被拆骨，射手马基亚迪、中场麦斯古斯同后衞富隆全部离队，虽然新签入嘅射手美密迪同中场高基连都几有质素，弊在佢哋上场波分别领红牌，今场停赛肯定缺阵，好似连个天都唔锺意弗赖堡咁样，对住拜仁真係唔知佢哋靠边个去偷鸡，被炒起好正常。

　　拜仁连续13场有波入

　　‧计埋热身赛，拜仁连续13场有波入。

　　‧拜仁近6次作客弗赖堡，取得5胜1和佳绩。

　　‧拜仁近5次作客弗赖堡，3次开「入球大」。

　　弗赖堡不设防捧大

　　拜仁话就话有欧超盃后顾之忧，不过佢哋人脚鼎盛，就算派后备球员打正选，实力都唔会差太远，唔使担心攻击力受影响。值得留意係，弗赖堡今季好似不设防咁，踢咗3场联赛就失咗8球，中场高基连又要坐波监，冇得落场帮手扫荡，你叫弗赖堡点顶得住锋力强大嘅拜仁?就算中位数3.5球照撑2.1倍入球大。