爱华顿今晚喺英格兰联赛盃第2圈主场对「英甲仔」史提芬纳治，两军实力有明显差距，相信呢铺就係「拖肥糖」力争主场开斋大捷嘅时候，即使让2球2.18倍「让球主胜」要支持。

　　(开赛时间︰周四凌晨2:45)

　　虽然仲未打开英超胜利之门，不过爱华顿头两仗演出一啲都唔失礼，如果上场联赛唔係西布朗门将宾科士打「上身」，「拖肥糖」话唔埋已经拎到今季主场首胜。「拖肥糖」今季虽然冇咗莫耶斯领军，好彩球会搵嚟同样识得以「蔗渣价钱踢出烧鹅味道」嘅马天尼斯执教。应付盃赛有一手嘅马天尼斯上季揸住队韦根都可以捧走足总盃，今季班手足换成费兰尼同巴尼斯等实力更高球员，加埋新加盟前锋干尼同当弗嘅小将巴克里，大把筹码畀佢发挥，今晚都係时候赢番场漂亮胜仗。

　　史提芬纳治刚终止连败

　　史提芬纳治上仗靠占士邓尼喺比赛末段入球，得以1:0击败诺士郡终止联赛三连败。赛后呢位入球功臣豪言球队有力砌低爱华顿晋级，之但係佢好似唔记得自己队波上季首席射手艾坚斯同守将塞利继续养伤，今晚对住上场对西布朗射咗22次门但一球入唔到，谷到成肚气嘅爱华顿想偷鸡都几难。