「巴塞式进攻」未练好

　　欧洲超级盃今晚爆发，由去届欧联冠军拜仁慕尼黑火併欧霸盃盟主车路士。有留意拜仁嘅球迷，都发现呢支德甲班霸开季走晒样，新帅哥迪奥拿套「巴塞式进攻」一味得个搓字，根本不切实际，今晚喺布拉格伊甸球场想报番11至12球季欧联决赛一败之仇?难啲喎!仲要让到成半一咁多，梗係捧稳打稳扎嘅车路士下盘着数啦!(有线61及201、中央5台周六凌晨2:45直播)

　　车仔开季仅失1球

　　以汤马士梅拿同纽亚为首嘅拜仁主将，赛前都话对前季欧联决赛耿耿于怀，今晚一定要报仇咁话。讲就容易，呢队上季三冠王今季由哥迪奥拿接手之后，明显仲处于过渡期，布阵场场都唔同，哥帅摆到明仲未搵到心水阵式。

　　就讲周中场德甲吖，哥迪奥拿为留力应付今晚场欧超盃，几乎派遣半队副选出击，就算全场有74%控球权兼17次射门，最后都只係同弗赖堡打成1:1平手，再次反映哥帅套战术模式好睇唔好食，想咬得入开季只係失过1球嘅车路士唔容易。

　　小猪扭伤足踝扎住上

　　况且拜仁今季由4231阵式转型为4141阵式，单防中令防守压力大增，虽然话周中扭伤右脚足踝嘅舒韦恩史迪加可以赶及复出，但扎住上要顶得住由奥斯卡杜斯山度士、舒贺尔尼同夏萨特组成嘅中前场三叉戟肯定恶啃。

　　据《衞报》透露，莫连奴收购朗尼失败之后，好有机会罗致前安治射手伊度奥，加上攻击中场韦利安已经来投(见下文)，一班以费兰度托利斯为首嘅球星肯定人人自危，为保饭碗今仗唔加多两钱肉紧点掂?车路士啱啱喺联赛同曼联互交白卷，弗到漏嘅尹佩斯拍住朗尼都撕唔破「蓝战士」大门，拜仁呢队冇牙老虎凭咩鍊赢车路士先?

　　车仔3战半场不败

　　‧车路士开季3战未试过半场落后。

　　‧拜仁连续3仗开入球细。

　　‧车路士新季3战都开角球细。

　　乜都玩锦囊

　　拜仁攻击球员係有卡士，弊在仲未适应哥迪奥拿套进攻模式，近期面对法兰克福、纽伦堡同弗赖堡合共只係入得4球，火力真係冇乜说服力。何况车路士领队莫连奴最耍家打守势波，以「蓝战士」开季只係失得1球咁大把嘅表现嚟睇，今场波唔慌多波入，1.95倍细好路呀!