群星自保凼番比历连尼

　　侯城都算唔好彩嘞，今晚佢哋会造访曼城，呢支「亿万大军」刚啱先输完畀卡迪夫城，今仗对住另一支升班队伍「老虎仔」，试问点可以再失威?曼城领队比历连尼赛前「靠吓」大打心理战，目的就係希望门将赫特同射手迪斯高醒醒定定，佢两个为保正选实会做番齣好戏，主场对住侯城肯定杀无赦，让2球照捧2.2倍「让主」。(now621台周六晚7:45直播)

　　曼城上周日输畀「火龙」2:3，出迎失误嘅赫特同两次走漏费沙甘保嘅萨巴列达係罪魁祸首，赛后比历连尼插完条防线之后，强调用人唔会理名气，暗示彭迪利蒙同射手尼格度都有机会担正。英国传媒估计佢老人家係想畀说话赫特同迪斯高听，姑勿论比历连尼係「靠吓」定抑或动真火，赫特同迪斯高为求自保，老虎蟹都要「骚哥利」证明实力。

　　侯城死火箭头孭唔到飞

　　虽然话队长高柏尼要到下个月中先可以复出，不过拿斯达锡今仗可以候命，米卡李察士亦已经复操，即係话比历连尼唔使再搵查维加西亚客串中坚。防线兵荒暂时纾缓，耶耶托尼就唔使成日瞻前顾后，可以放胆杀上前场辅助阿古路同迪斯高一对箭头，预期战况会几一面倒。

　　新季两战只係入得1球嘅侯城，今仗仲有前锋恩历克沙保坐波监，取代佢担正嘅丹尼格拉咸，已经连续1,056分钟喺英超冇波入，证明呢隻「老虎仔」真係冇牙，布鲁士带队去到曼城地头实唔敢贸贸然抢攻。况且「老虎仔」係靠占士谢斯达同居迪斯戴维斯两件「二打六」孭起防务重任，一对闸艾穆罕默迪同美罗费古罗亚又擅攻不擅守，有上冇落，随时畀大衞施华同捷西斯拿华斯两位「发电机」玩残，今铺对住一肚火嘅曼城想输少球都难。

　　蓝月亮地头场场入波

　　‧迪斯高係今季英超射门最多球员(10次)。

　　‧「蓝月亮」曼城对上51场英超主场赛事都有波入。

　　‧侯城前锋丹尼格拉咸嘅英超入球荒达1,056分钟。