骑呢好老细入场打气

　　英超开咧踢咗2至3轮，当中最令小妹意外嘅比赛，当然係新升班嘅卡迪夫城爆冷喺主场以3:2反胜豪门曼城啦，今晚呢支威尔斯球队食住个势，继续坐镇主场迎战爱华顿，既然上仗对住「蓝月亮」都可以反败为胜，小妹相信实力今非昔比嘅「拖肥糖」，更加係九死一生，冷吼卡迪夫城3.15倍主胜!

　　事隔51年重返顶级联赛嘅卡迪夫城，开咧战作客不敌韦斯咸0:2，虽然卡城全场有12次埋门，但就只得1次中框!点知去到第2轮赛事，卡城竟然有惊喜喎，凭曼联旧将费沙甘保梅开二度，加埋艾朗根拿臣嘅入波，主场反胜上季亚军曼城3:2，唔单止打开今季胜门，仲係球会史上第一场英超赢波添。

　　爱华顿颓爆英超未开斋

　　睇番卡迪夫城2场联赛嘅表现，小妹觉得佢哋嘅实力绝对係喺降班行列之上，所以今季佢哋应该唔止完成护级任务咁简单。尤其係前线球员嘅表现更加有板有眼，韦定咸、艾朗根拿臣同费沙甘保嘅威力真係唔讲得笑!仲有，卡城位班主陈志远虽然衣着骑呢，但陈生真係有心搞好队波，不断烧钱之馀仲入埋场亲自为球员打气，有位咁好嘅老细，相信卡城众将一定会格外卖力嘅!

　　相反，爱华顿开季至今仲未开斋，头两场赛事分别以2:2同0:0赛和诺域治同西布朗，周中联赛盃仲要打到加时先赢到甲组仔，班兵明显冇态啦!咁又难怪嘅，事关带足爱华顿11年嘅莫耶斯转投曼联，前韦根教头马天尼斯上任，球员未必可以一时三刻就适应新领队嘅战术!唯一值得留意嘅係19岁中场巴克里，佢喺第1场英超一鸣惊人入靓波，就连领队马天尼斯都觉得佢潜质优厚，不过讲到尾，唔通1个细路就可以救到成队波咩?今晚作客如狼似虎嘅卡城，睇怕都係凶多吉少咯。