好多人以为日本人守礼讲规矩，觉得佢哋啲球迷会好文明，其实树大有枯枝，日职有啲拥趸都好野蛮，例如今日主场对新潟天鹅嘅浦和红鑽，佢班Fans有唔少暴徒，上星期就有4条友搞事畀差佬拉咗。(开赛时间：周六下午5:00)

　　4件红鑽粉丝搞事被捕

　　讲真，今日嗰3场日职直播波，都唔及呢场话题咁多。上个礼拜浦和作客赢清水2:0场波，就发生咗浦和Fans向清水队巴掟烟花、炮仗嘅事，其中有4个「红趸」仲失控到推撞啲保安被捕，早两日浦和就宣布将呢几条友列做不受欢迎人物，暂时禁止佢哋入场睇波，至于终极处分係乜，仲要等法庭判咗再决定。

　　天鹅14次造访埼玉输12次

　　有班狂热嘅拥趸其实係好事，尤其主场出击，嗰种霸气唔係咁多客队顶得住，对自己班球员亦会产生一种无形嘅推动力，所以浦和今季响日职打咗11场只输过畀横滨同清水，赢嘅7场波里面，开咗两次「主其他」，有6场总入球4球或以上，由呢啲数据就睇到，呢支「日本红魔」係典型嘅土豪劣绅，响地头恶晒。

　　天鹅今季开坏咗个头，家阵响中游唔上唔落，乜都冇佢份，而且以往14次作客埼玉县，只和过两次其馀输晒，今场波博佢哋赢真係好抿水。但係佢哋早轮由浦和签咗件前锋田中达也之后，成个攻击环节有生气过以前，今日有权入波，1.62倍入球大几稳阵，不过浦和例牌主场发癫，1.63倍主W一样咁稳，狠啲仲可以博2.75倍「让球主胜」添。