今个星期推介美职赛事，由圣荷西地震作客洛杉矶银河，防线双核停赛之馀，啱啱仲远征完危地马拉踢中冠盃，球员体力输蚀随时演出走样，撑银河赢「2:0」。(开赛时间：周日早上10:30)

　　地震上场作客达拉斯捉到鹿唔识脱角，喺领先两球大好形势下被逼和，最惨嘅係后防孖宝祖斯甸莫路及贝拿迪斯喺比赛末段双双红牌被逐，今场陪住黄牌够数嘅中场枢纽拉菲尔巴卡作壁上观，令攻守实力削弱。

　　再者，地震日前喺中冠盃远赴危地马拉与希雷迪亚输0:1，计埋听朝出战银河已经係佢哋连续3场作客比赛，球员接连长途跋涉，体力未必恢复得切，落到场随时脚仔软。相反洛杉矶银河目前3连胜状态勇锐，近两场防线更係稳如泰山冇失波，听朝主场续有当路云、罗比坚尼等进攻好手压阵，要轻取地震「2:0」话咁易。