今季英超帅位出现大变动，除咗曼联、曼城同埋车路士齐齐易帅外，连史笃城都换咗由晓士领军。佢哋依家成班球员明显仲适应紧新踢法，今晚作客夹惯夹熟嘅韦斯咸，随时半场就落后对手，2.45倍「半场主胜」抵玩。

　　(now623台周六晚10:00直播)

　　史笃城未适应晓士新踢法

　　有传史笃城嫌前领队佩尼斯嘅传统英式踢法唔好睇，所以今季搵嚟晓士执教，冇错，就係嗰位上季为大事扩军嘅昆士柏流浪写下开季12场联赛不胜嘅领队。佢今季减少史笃城长传嘅同时亦搞到后防唔多稳阵，佢哋连续两场联赛都喺半场就落后，就连弱旅水晶宫都偷到鸡，就知班波仲未适应到新踢法，今仗随时半场未到又已经失守。

　　对手韦斯咸连续两场联赛保持清白身，防线表现硬淨。将帅之间冇出现咩大变动，自然有利班波喺季初发挥抢分。最紧要係主帅艾拿戴斯善用失意军人，相信新加盟嘅翼锋达宁好快就可以融入队波，提供弹药畀前锋迈加同擅长杀入禁区搵食嘅中场祖高尔、路兰，一于支持佢哋连续3次喺主场出战就喺半场领先对手。