莫耶斯去亲晏菲路例冇货交

　　近年利物浦畀人标籤做「海鲜波」，皆因佢哋表现难以捉摸，好多波都係应赢就和，应和就输，激死唔少捧场客。之不过红军新季罕有起飞，逆境之下连赢史笃城同阿士东维拉保持100%胜率，运势明显好转，以谢拉特为首嘅战将都话信心返晒嚟!今晚佢哋喺英超Super Sunday早场同曼联合演「双红会」，正所谓宁买当头起，对住去亲晏菲路都冇货交嘅曼联领队莫耶斯，唔係冇机会偷鸡，平手盘一于撑利物浦。

　　(now621台及广东体育周日晚8:30直播)

　　利物浦喺开锣战凭米洛列特勇救12码险胜史笃城，上个礼拜畀维拉揿住嚟砌都照样攞晒3分，摆到明一副行运格。最重要係队长谢拉特话，今季阵营士气同信心都属近年最佳，有信心可以拉近同曼市双雄以及车路士嘅距离，斗心冇得顶。虽然话周中联赛盃踢得辛苦，加时后先以4:2淘汰英甲嘅诺士郡，但最令领队罗渣士安慰嘅，係两位主将史杜列治同佐敦轩达臣弗到不得了，当中史杜列治新季3战更加场场有波入，脚风顺到不得了，今晚随时又有「士哥」。

　　曼联欠霸气唔易攻得入

　　今晚开波前会为球会传奇领队辛克利鼓掌致敬1分钟嘅红军，跻身联赛盃第3圈嘅代价唔细，守将阿里施苏高、高路托尼同中场祖阿伦先后伤出，3人入面以32岁嘅高路托尼缺阵最令球迷担心，消息话会方未知佢嘅鼠蹊伤势有几严重，如果佢今仗缺阵，史卡迪尔就会担正，呢位斯洛伐克中坚上季已经失宠，加上球会近日着手斟介尼史葛，史卡迪尔难得有机会落场肯定会醒醒定定。

　　对家曼联牌面係秤先，但自从由莫耶斯今季执掌之后，「红魔」明显冇咗爵爷时代嗰份霸气。就讲啱啱场「曼车大战」，车路士摆到明守势博攞1分，但佔尽上风兼赢晒控球权嘅曼联始终咬「蓝战士」唔入，莫耶斯对住防守力强嘅队伍似乎冇乜「符弗」，想撕破开季两战都保持不失嘅利物浦大门似乎有隐忧。再讲莫耶斯昔日带领爱华顿，喺英超22次硬撼利物浦只係赢3场，去到晏菲路更加未赢过，平手盘宁捧当头起嘅「红军」。

　　谢拉特係曼联剋星

　　‧谢拉特近6次英超斗曼联攻入4球。

　　‧莫耶斯历来喺英超领军访晏菲路得6和5负。

　　‧曼联对上6次造访利物浦只曾1胜。

　　追红军1.83倍「第一队入球」

　　利物浦新季表现抢缰，连同周中场联赛盃在内，佢哋开季3战都喺上半场先开纪录，今季已经攻入4球嘅史杜列治脚风顺到爆，首球要吼实之馀，1.83倍嘅利物浦「第一队入球」都唔怕追!