北伦敦打吡 世仇碰头!

　　夏季转会窗进入倒数阶段，阿仙奴继耶耶辛洛高后，日前再免费翻兜中场法米尼，至今一个崩都未使过，兼夹伤兵成箩，今晚喺酋长球场恶斗「亿万大军」热刺难言稳胜，之不过两军喺「北伦敦打吡」例牌开入球骚，咪谂咁多，简单啲捧个1.62倍大啦!

　　(now621台及广东体育周日晚11:00直播)

　　阿仙奴依家有两样嘢多，第一当然係「险签」多啦!今夏同「兵工厂」扯上关係嘅球员多不胜数，唔计有吹水成分嘅卡斯拿斯，最近就有纽卡素中场卡比耶及华伦西亚门将古亚达，有指云格嫌对方叫价太高所以放弃收购，为「险签名单」再添两员勐将。第二就係伤兵多，阿迪达、华美伦、阿历士张伯伦、戴亚比全部打柴，原本预计抖3星期嘅普多斯基，日前证实伤势比预期严重，最少要抖10个星期，今晚又唔使预佢喇。

　　基奥特係伦敦效率王

　　虽然两「多」搞到云格头都痕，但佢都讲明今场会照攻同热刺死过：「北伦敦打吡拥有独特嘅气氛，令大家落到场充满进攻意识，充满对胜利嘅渴求。」咁又係喎，翻查纪录，两军近7次联赛会师酋长球场，合共攻入36球，场均有逾5球交收;前锋基奥特踢伦敦打吡仲特别醒神，至今喺英超攻入嘅13球，其中7球係喺同市打吡取得，效率为历年「厂仔」之冠。

　　相反，「厂仔世仇」热刺继签入荷西保连奴、苏尔达杜后，再以破球会转会费纪录3,000万镑签埋罗马锋将拉美拿，连埋布加勒斯特星队中坚捷利捷斯、阿积士中场基斯甸艾历臣日前相继加盟，热刺喺今夏已投入逾1亿镑，1个巴利换到咁多件勐将，仲要玩嘢搞到孤寒佬云格买唔到人，抵到烂啦!既然连残阵嘅阿仙奴都学人丧攻，试问阵容鼎盛嘅热刺又点会缩沙先，大家等睇入球骚啦!

　　半全场都旺入球大

　　‧双方近14次联赛对碰，其中13次总入球超过2.5球。

　　‧双方近7次联赛会师酋长球场，总共出现36个入球。

　　‧阿仙奴近5次喺主场上演「北伦敦打吡」，全部开出「半场大」。