两大球王拍住上!

　　今晚西甲重头戏，华伦西亚喺主场迎战巴塞隆拿。「蝙蝠兵团」上星期作客爱斯宾奴只係踢咗半场好波，最后喺领先球下连失3球以1:3见负，今晚仲要对住「地上最强」巴塞，就算有主场之利，都绝对掂唔过。一于力撑有美斯复任正选，有可能同尼马再度合作嘅巴塞隆拿「让球客胜」啦!

　　(now632台及广东体育周一凌晨3:00直播)

　　华伦靠普斯迪加蛇都死

　　华伦西亚2战入2球，锋力唔算突出，主因当然同主力射手苏尔达杜转投热刺有关啦，虽然老牌前锋普斯迪加由萨拉戈萨来投，但讲真，呢位葡萄牙国脚有几多料大家心照，佢又点可能取代到苏尔达杜吖?事实上，华伦近年财困，主力相继离队，今届更无缘角逐欧联，连条水喉都冇埋，嚟紧呢班波只会愈嚟愈沉，「张峰」深信即使佢哋今晚有主场之利，亦未必帮到几多。

　　随住开咧战以7:0大破利云特有个好开始，巴塞即使周中喺西超盃次回合有美斯12码宴客，赛和马体会0:0，但亦能凭首回合尼马嘅作客入球捧走西超盃，对士气有一定帮助。球王美斯周中复出，今晚9成9会正选上阵，上仗见佢同尼马首度合作，默契比想像中好，嚟紧肯定会有一番作为。係，虽然巴塞后防仲有长期伤兵佩奥尔缺阵，要继续用马斯真兰奴客串踢中坚，但呢位阿根廷国脚都已经惯晒啦，根本唔需要担心。

　　A山休息尼马9成担正

　　赛前教练马天奴又走出嚟话，今场波会畀周中西超盃正选上阵嘅阿历斯山齐士同沙维休息，不过巴塞人才济济，使乜惊冇人顶上?最重要係A山唔踢，即係话尼马好大机会正选披甲，同寻日复操嘅美斯拍住上，咁锋力咪仲有保证!而且嚟紧国际赛周，巴塞唔使好似上星期咁就住就住，今晚一定去尽，「让客」有2.18倍咁好分，放心追捧啦!