要讲英甲开季最Fit嘅球队，肯定非奥连特莫属。佢哋喺联赛取得5连胜之馀，队中三叉戟嘅威力绝对唔讲得笑。佢哋今晚要喺英格兰联赛锦标第1圈作客状态差到爆嘅基宁咸，有力延续佳绩，2.2倍客胜值得一试。

　　(开赛时间：周三凌晨2:00)

　　基宁咸11战不胜

　　奥连特今季咁威水，有赖前线三叉戟入波当食生菜，前锋列斯比、戴夫穆尼同中场奥度巴祖5场联赛一共轰入10球，试问基宁咸守得边个。而且呢班波后防亦唔失礼，联赛只係失咗2球，就算早前喺联赛盃越级挑战侯城，都係去到加时先以1球败阵，况且中场柏迪、守将马菲奥宾特利复出，阵容更见完整。睇番奥连特喺上届都打入4强，佢哋明显几重视呢个比赛，唔似会「揸流摊」。

　　计埋季前热身赛，对手基宁咸已经连续11场比赛赢唔到，状态差到吓死人。佢哋上仗喺主场迎战同样喺联赛未开斋嘅布里斯托城，如果对手把握力好啲，真係1分都保唔住。佢哋依家士气直插谷底，防中连根斯同后衞费殊仲要休战，反底未係时候囉。