换上新帅修夫基领军嘅英格兰U21，今晚会踏出佢重建球队嘅第一步，喺2015年U21欧国盃外围赛第1组首战中，主场迎战摩尔多瓦U21。「幼师兵团」虽然有几名主力抽调咗去做大国脚，不过「修哥」今次点兵都仲有曼联三宝支撑，前线韦费特沙夏、连格同守将米高坚尼都係好波之人，对住实力平平嘅摩尔多瓦当然炒得起，就算让到2球1.7倍「让主」要捧!(now621台周五凌晨2:45直播)

　　修夫基处子领军

　　外围赛其实早喺今年3月已经开打，不过由于赛期同英格兰U21有份踢嘅2013年U21欧国盃决赛周赛期重叠，所以「幼师兵团」到依家先踢首场分组赛，反而排榜首嘅立陶宛已经踢咗3场有7分添。自从暑假决赛周分组赛3战全败后，英格兰U21主帅位就由皮雅斯换上修夫基，球队早前同苏格兰U21拍跳大捷係由大国脚领队鹤臣领军，今晚先係「修哥」嘅处子战，班小将为讨好新帅，又点敢唔搏命先?

　　人脚方面，修夫基今次拣选嘅25人大军，不乏高质新星，其中曼联三宝喺之前红魔鬼亚洲之旅，大家都见识过佢哋实力。反观摩尔多瓦U21大军除咗中场卡达连卡普係喺基辅戴拿模搵食，其他都喺当地联赛打滚，真係实力有限，今仗又搵乜同幼狮兵砌呢?