日皇盃第2圈今日继续开战，名古屋鲸鱼喺主场对长野帕塞罗，未必炒得起对手，冷敲2.4倍入球细好过。虽然鲸鱼牌面赢晒，不过日本传媒话，佢哋今场波唔会用最强阵容应战，包括射手约舒亚坚尼地、玉田圭司等全部唔踢，相反，帕塞罗有唔少球员踢过日职或者日乙，战斗力冇想像中咁差，应该顶得吓o架!(开赛时间：周日下午2:00)

　　前锋拍档坚尼地 玉田圭司缺阵

　　假如双方都以强阵出击，日职劲旅鲸鱼同非联赛嘅帕塞罗牌面当然差咁几班啦，但日本消息话，鲸鱼喺今场波主要起用年轻球员，配合一班唔係成日有得踢嘅后备兵迎战对手，意味住王牌射手玉田圭司、中场小川佳纯、「新郎哥」阿部翔平等主力都会休息，加上另一件中锋约舒亚坚尼地被澳洲徵召踢太公波斗巴西，就算中场藤本淳吾主动要求担正，最近由比甲标准列治外借回归嘅前锋永井谦佑(左下图左)又话想搏杀，但个阵天残地缺，佢哋班队友质素又未必话好高，想炒起对手真係有难度。

　　帕塞罗有几件前J咧球员

　　对家帕塞罗係有骨鱼腩，佢哋今季由带过德岛漩涡嘅美浓部直彦执教，阵中又有几件踢过日职同日乙嘅球员，包括前FC横滨射手青木翔太、踢过冈山绿雉嘅中场大道广幸、美浓部嘅爱徒后衞平岛崇等，对住鲸鱼班二打六，只要肯守，真係未必会被大败o架。

　　赛制

　　日皇盃现阶段为第2圈，若法定时间内打和将加时30分钟，未分胜负则互射12码决胜。