预备组孖宝激发队友斗志

　　为咗担正，你可以去到几尽?普雷斯顿嘅祖尔拜林同史葛拉亚特，由预备组搏到上番嚟一队打正选，证明肯努力嘅话一定有回报。普雷斯顿喺国际赛档期阵容不整，领队格雷臣讲明会畀机会副选兵，佢哋为争上位肯定会珍惜机会，今晚喺英甲主场斗奥咸正正係「骚哥利」良机，一于捧1.88倍主胜。

　　(开赛时间：周二凌晨2:35)

　　奥咸几件踢太公波缺阵

　　司职中场嘅祖尔拜林同左闸史葛拉亚特，季初畀普雷斯顿领队格雷臣投閒置散，连一队都入唔到，不过呢两隻仔争气，喺预备组踢到晓飞之后获重召上一队，8月底终于重返正选，当中祖尔拜林上仗仲有波入，协助球队大炒华素尔3:0。适逢中场堪富利同前锋侯姆今晚缺阵，格雷臣话会搵两个副选兵顶佢哋，边两位后备仔今晚有份落场，都肯定会搵祖尔拜林同史葛拉亚特做借镜对象!

　　计埋10月7日举行嘅英格兰联赛锦标次圈赛事，奥咸将会喺4星期内两度造访普雷斯顿，呢支由李尔庄臣领军嘅球队今晚想攞头威唔容易，事关后衞祖杰斯、云彻斯特同中场基克米拿都因为要踢太公波缺阵，守将干洛布朗同射手查理麦当奴又养紧伤，个阵残成咁点同普雷斯顿鍊呀?