捷克老将孭飞实力曳

　　「非洲战士」撑起意大利，强闯巴西!呢支4届世盃冠军今晚喺欧洲区外围赛B组主场迎战捷克，只要赢波就可以出线巴西世盃决赛周，「蓝衫军」今仗有前锋巴洛迪利复出挂帅，赛前更获意大利首位黑人部长打气，配合其馀两位「非洲外援」奥邦拿同艾沙拉维，呢股「黑势力」绝对唔係人咁品，2.4倍「让主」博得过!(now633及660台周三凌晨2:45直播)

　　意首位黑人部长劲讚巴神

　　意甲球坛近年发生唔少种族歧视事件，呢样嘢对身为意大利移民部长基恩吉嚟讲绝对唔陌生，事关佢都曾经畀人掟蕉。适逢「蓝衫军」备战今场世盃外围赛同基恩吉住埋同一间酒店，日前大军就拉队拜会呢位女部长。基恩吉亦勉励佢哋要为意大利未来而努力，仲特别点名称讚对抗种族歧视不遗馀力嘅「巴神」：「巴洛迪利同我一样，佢都係喺度开创紧新道路，虽然我哋面对重重难关，但绝对唔会放弃。」

　　事实上，除咗拥有加纳血统嘅巴洛迪利，「小法老」艾沙拉维同埋后防主将奥邦拿都係嚟自非洲，呢3位仁兄唔单止係国家队主力，亦係所属球会AC及祖记嘅新世代核心，质素够晒保证，家阵仲获黑人部长打气，呢班「非洲战士」发起威上嚟，的确唔係人咁品!

　　捷克上仗主场输畀阿美尼亚

　　係，虽然「蓝衫军」守将阿比迪同卢卡安东尼利齐齐因伤退队，但补选番柏斯哥迪迪施维斯查，战斗力影响唔会太大。最重要嘅，係中场蒙杜利禾及前锋奥斯华度齐齐坐完波监，畀到主帅柏兰迪利更多选择。佢哋目前以7战17分排喺榜首，只要今晚赢波，就唔使理其他赛果，可以攞到进军巴西入场券，落到场肯定打甩髀。

　　对家捷克家阵排喺小组第3，实力麻麻，上星期五仲够胆死喺主场输畀阿美尼亚，始终班波踢到依家都仲係靠老兵施治同路斯基支撑，佢两个今季开咧以嚟都有多少跌Watt，整体战斗力自然今非昔比，即使捷克仲要争次名攞附加赛资格，恐怕都係有心无力囉。

　　乜都玩锦囊

　　柏帅进取玩埋半主+主主

　　意大利喺今届世盃外分组赛主场3战全胜，证明佢哋地头威力好强。领队柏兰迪利係新派领队打法相对进取，唔会慢慢磨，睇番佢哋3场胜仗都係半场已经领先，2.02倍半主同2.1倍半全场「主主」都值得一试o架!

　　Data King

　　蓝衫军对赛「细」如破竹

　　‧意大利係欧洲区7支不败球队之一。

　　‧两军近6次交手有4次开入球细。

　　‧意大利分组赛主场3战全胜，共入6球仅失1球。