「冇牙狮子」难发恶!英格兰今晚喺世盃外欧洲区H组作客乌克兰，锋线继王牌朗尼打柴后，韦碧克又黄牌够数要坐波监，就连史杜列治都归队无望，想靠「中年新秀」列基林拔单天保至尊?怕且好难喇，捧乌克兰1.9倍平手盘坐和望赢。 (now621台周三凌晨2:45直播)

　　英格兰斋靠「中年新秀」林拔

　　修咸顿射手列基林拔继国家队处子战顶爆苏格兰后，上轮斗摩尔多瓦又有斩获，状态唔错，但值得留意嘅係呢两场波都係喺温布莱踢，今趟佢首度远征基辅，表现可能冇之前咁标青。何况喺史杜列治宣布退队后，领队鹤臣讲明唔会补选球员，换句话讲除咗列基林拔，正箭头得番迪科尔1个，但佢喺热刺沦为替补，状态成疑，如今英格兰变成「冇牙狮子」，恐怕赛前扬言喺巴西世盃后退役，今晚将第100次代表国家队嘅林柏特都难以力挽狂澜。

　　相反，乌克兰日前炒圣马力诺9:0，过程轻描澹写耗力唔多，领队科文高喺下半场早段已收起舒夫卓克同泰摩斯卓克，过多个骨连翼锋耶莫兰高都换走埋，摆明留力撼英格兰。再者，乌克兰最近4场丧入15球兼冇失波，绝对係攻守兼备，仲要有成68,000球迷做后盾，英伦Fans得嗰2,000人，平手盘真係几抵买o架!