巴西係2014世盃主办国，唔使踢外围赛自然益晒宿敌阿根廷，呢支劲旅家阵喺南美洲区外围赛也文也武，如果其他战果啱嘴形嘅话，听朝随时未开战就已经攞到决赛周入场券，出线坐定粒六，战意有几多真係好难讲。况且阿根廷受伤停问题困扰，今场足足有4位防守大将唔出得，听朝造访一心搞破坏嘅巴拉圭唔係赢硬，既然两队火力都有番咁上下，捧1.95倍大似乎最稳阵。(开赛时间：周三早上9:40)

　　阿根廷4大守将缺阵

　　揸住26分嘅阿根廷係南美洲区外围赛「一哥」，由于今战係本轮外围赛嘅压轴战，如果较早开波嘅厄瓜多尔及乌拉圭有咩冬瓜豆腐，咁阿根廷随时喺开战前就笃定跻身决赛周，亨格比利睇唔出佢哋嘅战意会有几高昂。再讲，今场波阿根廷除咗有射手希古恩要停赛，最大剂係一对中坚加雷、费达历高费南迪斯同防中马斯真兰奴都要坐波监，加上左闸马高斯卢祖因伤缺阵，即係话阿根廷足足有4位中后场要员唔出得喎!

　　佢哋前日喺位于布宜诺斯艾利斯嘅埃塞萨练完波之后，领队沙贝拉向记者话已经度掂11个正选阵容，当中美斯会联同迪马利亚、阿古路同脚风几顺嘅柏拉斯奥合组「四叉戟」，后防就搵甘柏拿路同巴辛达两位散仔担正，有前冇后，巴拉圭要撕破阿根廷大门唔係冇机。

　　巴拉圭下调票价爆扑飞潮

　　係，今仗喺首都亚松森出击嘅巴拉圭基本上已经Game Over，唔单止要望隔篱嘅乌拉圭输畀哥伦比亚，自己亦要砌低阿根廷先有望争踢附加赛，难度极高。之不过领队真尼斯似乎已经放眼将来，今次大军总共拣咗6位「90后」入伍，赛前记招亦冇讲过咩要保住一丝出线希望嗰啲行货嘢，反而话要「Try to damage」，摆明要存心搞破坏落阿根廷面。

　　查实自真尼斯上任后，巴拉圭已经有逼和德国3:3同大炒玻利维亚4蛋嘅佳绩，两仗狂入7球嘅表现令人眼前一亮。消息话巴国足总仲将今仗票价定到最低10万巴拉圭瓜拉尼(约173港元)一张刺激入座率，搞到球迷疯狂扑飞，咁多乡亲父老撑场，相信巴拉圭就算输，都肯定搏命队番一至两粒交代啦!

　　Data King：交手旺开半场大

　　‧巴拉圭连开4口大。

　　‧阿根廷近两次造访巴拉圭都输波。

　　‧双方近两次交手都开半场大。