中北美双雄齐失威

　　美国同墨西哥一向都雄霸中北美洲，对上2届世界盃中北美洲区第4圈分组赛，都係呢两队包办头2位。点知今届佢哋齐齐失威，冇晒中北美洲霸主风范。听朝两军交手，美国只要赢波同埋巴拿马失分就肯定出线，不过佢哋冇咗多件主力，唔係咁易喺啱啱换帅嘅墨西哥身上入波，大家都要力求稳阵，1.62倍入球细抵玩。

　　(开赛时间：周三早上8:06)

　　墨西哥易帅部署求稳

　　美国上仗输畀哥斯达黎加，结果将小组榜首位置拱手相让，更大镬嘅係前锋艾迪杜里、守将谢夫甘马伦、马特比斯拿3将今场要停赛，中场米高巴特利赛前亦报称有伤。虽然球队已经补选中场哥朗拿、巴特戴维斯、荷西托利斯、守将葛特臣，但一下子冇咗4件主力，实力梗係大受影响，想入多粒都唔易。

　　墨西哥上场输畀洪都拉斯后，随即宣布辞去领队迪拿托利，改由泰拿领军。呢位新帅上年带过墨西哥喺伦敦奥运夺金，属有料之人，有助重整球队。不过射手查维亚靴南迪斯因状态不足，上仗冇得打正选，前线得番杜斯山度士的确孤掌难鸣，加上今场仲要作客，睇怕佢哋都係先做好防守，唔会冒险抢攻。