加纳正选龙门倦勤

　　日本今晚会喺第2场麒麟盃主场迎战加纳，相比起上星期五嘅对手危地马拉，显然2010世界盃8强之一嘅非洲球队加纳级数较高，就算大部分星级球员唔在阵，出副选攻击力仍然有睇头。要知道日本一遇强手，条豆腐防线就随时会献丑，最惨嘅係教头沙哲朗尼似乎无意执番正佢，今场睇怕又係以攻为守，小弟认为今场取2倍入球大最划算。(有线61及201周二晚6:20直播)

　　沙哲朗尼未执正东瀛防线

　　日本喺6月去巴西踢咗3场洲际国家盃，表现认真唔争气，总共失咗9球，上个月热身赛又畀乌拉圭炒4蛋，不过领队沙哲朗尼今次就冇因为「前车可鑑」而特别针对后防改善，佢仲话：「我对我班球员有信心，虽然呢排成日失波，但係其实係同佢哋嘅体能有关，因为之前欧洲联赛歇紧暑，一时状态未返嚟啫!」好彩前线仲有本田圭佑、香川真司等顶级攻击球员，惟有用进攻弥补条防线不足啦!

　　加纳今次参赛，有多达10名球星缺阵，进攻中场奇云保定、射手基恩同阿休全部因伤冇随军，不过有艾度马同埋基斯甸艾素等攻击手压阵，仍然足够撕破日本条防线。可惜佢哋个正选龙门阿当拿臣鼠蹊受伤宣布退队，令加纳条近6场有5场失波嘅防线再添漏洞，想保住清白大有难度，都係同主队日本一齐演番场入球骚啦!