明尼路听朝喺巴甲主场迎战哥列迪巴，继续有朗拿甸奴铺桥搭路组织攻势，两名防守核心坐完波监更令阵容回复完整，今场面对前线大伤「锋」兼夹作客脚软嘅哥列迪巴，笔者睇好明尼路能够高奏凯「哥」，热食1.54倍主胜。

　　(开赛时间：周五早上8:00)

　　哥列迪巴係「作客虫」

　　明尼路防守中场祖殊前排伤患缠身，另一名防中比亚尔同中坚利华汉拔图上场更加双双停赛，搞到近期防守漏洞百出，唔係领先后守唔稳被逼和，就係早早落后再艰苦扳平。不过，呢几名主将今场终于齐章，成功稳固防线之馀，再配合老而弥坚嘅「细哨」负责派牌，要赢波重拾勇态简直係Easy Job。

　　另方面，哥列迪巴今季9场联赛作客赢得1场不特止，连同南球盃嘅话，佢哋目前更陷入4连败劣势，名副其实係「作客虫」。再者，迪维迪与施萨达施华呢对前线拍档，现时一个养伤、一个哑火，副选安达臣艾基奴同拿费尔达施华又抖紧，依家靠晒即将踏入36岁嘅中场阿历士撑起队波，但今场想攻破防守固若金汤嘅明尼路，怕且好难。