哈化获「医神」打救!所谓「医者父母心」，虽然禾法特係拜仁军医，不过睇见旧部施巴斯坦兰甘有难，「医神」谂都唔谂就医番好呢位哈化守将，配合埋决心抢番个指挥官席位嘅朗尼希巴臣复任正选，哈化今晚喺「无敌主场」恭候史特加可睇高一线，哈化让平半，撑上盘。

　　(有线61及201周六凌晨2:30直播)

　　兰甘获医神打救奇迹复出

　　施巴斯坦兰甘早排大腿肌肉撕裂，一般嚟讲呢种伤要抖两星期至两个月不等，不过呢位拜仁旧将同哈化军医商量过后，决定搵拜仁「医神」打救，禾法特前日只係喺施巴斯坦兰甘隻脚同背嵴各打一针，呢位哈化战将就可以即刻复操，今晚仲可以候命添，无疑係哈化嘅一大喜讯。

　　哈化攻击中场鲍祖汉因十字韧带撕裂长抖，朗尼希巴臣将会同新兵施格斯争正选，当中喺去季攻入18球兼交出14次助攻嘅朗尼希巴臣新季失宠，今仗仲唔出尽浑身解数取悦教练卢侯卡尔咩!对手史特加上仗赢贺芬咸6:2开斋，不过佢哋计埋欧洲赛在内，近3场作客波全部输晒，今铺造访对上19场主场赛事未输过嘅哈化，仲可以有咩期望吖?