比利时前锋卢卡古喺转会窗最后时刻畀车路士外借去爱华顿，今晚两支「蓝军」对垒，虽然碍于借用条例，卢卡古唔能够倒戈车仔，不过佢竟然话希望「拖肥糖」可以赢波，唔知莫连奴仲会唔会畀佢返去呢?嘻嘻!但睇番爱华顿开季至今3战全部打和得3分，只排中下游位置，相反车路士喺「寸王」回归后一开波已经挞着，3仗取得2胜1和佳绩，无论战绩同人脚，车仔都赢成条街，今晚「蓝战士」食硬呢粒「拖肥糖」，一于捧2.08倍客胜!

　　爱华顿开季嘅成绩认真麻麻，冇咗莫耶斯真係要一啲时间适应，开季3场联赛分别对住诺域治、西布朗同卡迪夫城都赢唔到，联赛盃对史提芬纳治仲要踢到加时先赢2:1，对住实力一般嘅球队都踢得咁辛苦，今场硬撼车仔点顶呀?

　　伊度奥再拍寸王有望登场

　　转会窗关闭前最后一刻，爱华顿主力费兰尼又转投曼联，冇咗呢个「爆炸头」相信会对呢班波好大影响，代替佢嘅好大机会係新星巴克里，但论实力同经验绝对比唔上费兰尼，借用嘅卢卡古又唔出得，今场认真大镬，就算有曼城借用新兵巴利登场，都未必帮到几多手。

　　另边厢，「寸王」喺季前已讲到明今季要一统英超天下，开季表现亦令球迷满意，暂时排喺积分榜第2位形势唔错。新加盟嘅喀麦隆前锋伊度奥已经参加车仔操练，今晚有望正选上阵，佢効力国际米兰嗰阵同莫连奴合作无间，成功帮国米成为「三冠王」，佢哋再次合作随时又擦出火花。加埋伊云洛域、林柏特同奥斯卡杜斯山度士，无论战绩同人脚实力，车仔都赢爱华顿一大截，就算今晚作客都冇有怕，一于捧车路士客胜!