今晚英超史笃城主场与曼城合演「双城记」，首名入球吼实「蓝月亮双尼」耶耶托尼、尼格度。

　　史笃城喺英超揭幕战不敌利物浦后，目前正值3连胜睇落好Fit，不过佢哋喺联赛淨係入过3球，而且入波嘅宾纳、查理阿当同梳尔哥斯全部都唔係箭头。除咗前锋高治场上「失踪」，坚韦尼锺斯呢排虽然入唔少波，包括英联盃斗甲组仔华素尔连中三元，同埋早前热身赛为千里达两场入3球，可惜返到英超即时冇货卖，至今仲未开斋。

　　对家曼城双箭头阿古路同迪斯高至今演出唔算标青，再者「首球」赔率分头咁低亦唔多值博。相反喺中场助攻助守嘅耶耶托尼，喺曼城今季两场联赛胜仗都有份入波，值得冷敲。

　　至于新援尼格度则接替迪斯高成为「后备杀手」，最近两场后备入替都有波入，上场斗侯城更係靠佢「首球」打破闷局，今晚玩「首球」千祈咪错过「蓝月亮双尼」!