罗拔仔伤势唔严重踢得

　　上个周末国际赛期告一段落，今晚联赛秩序恢复正常，德甲又有好戏，由开季全胜嘅多蒙特主场迎战汉堡。照牌面睇唔使问梗係「蜜蜂兵团」赢面高，不过佢哋一班国脚啱啱归队，下周中又要踢欧联第一轮分组赛，精神同体力难免会受影响。好在有消息话射手罗拔利云度夫斯基伤患冇问题，今晚可望披甲，咁多蒙特就可以继续强攻本色，中位数3.5球都要捧1.95倍入球大。

　　(有线61、64、201及203周日凌晨0:30直播)

　　汉堡新锋线煞食

　　多蒙特阵中大把国脚，所以上星期几乎全队都去晒踢国家队，冇得乘机抖抖，唔单只体力受影响，一个唔该仲有伤病危机添!马高列奥斯同罗拔利云度夫斯基就分别冇踢周中嗰轮国际赛，不过马高列奥斯只係肠胃炎，今场应该可以上阵;至于「罗拔仔」呢?多蒙特军医亦证实佢伤得唔严重，今场可以踢得，加埋米希达利恩愈踢愈好，多蒙特火力始终最信得过。

　　汉堡上场击败布伦瑞克终于打响今季胜鼓，虽然队长云达华治大腿受伤，今场未必踢到，不过睇上场表现，土耳其新星查汉奴古嘅活力同「云队长」相比有过之而无不及，佢上场梅开二度，充分显示速度同处理死球嘅能力，搭埋件身高达1米89嘅拉苏加喺前面冲锋陷阵，呢对崭新攻击组合好唔简单，「蜜蜂仔」一个唔留神，真係会畀佢吓一跳o架!

　　顶占笋盘：多蒙特(入球大)