经过一周国际赛期，西甲今晚战火重燃，巴塞隆拿会喺主场扑击西维尔。「地上最强」开季至今3战全胜弗爆，张峰相信即使联赛小休都唔会对佢哋有乜影响，最紧要係美斯同尼马两大巨星脚风大顺，扭紧计倾续约嘅恩尼斯达又要搏命「骚哥利」，今晚仲唔搵西维尔祭旗?让2球都唔惊，一于追2.08倍巴塞「让主」。(now632台周日凌晨2:00直播)

　　西维尔西甲未开斋

　　巴塞上轮作客华伦西亚，整体有上佳发挥，大部分时间控制战局，美斯更大演帽子戏法，若非华伦有普斯迪加突然发威入番两粒靓波，巴塞话唔定又大炒一场。「地上最强」咁弗，返到鲁营又点会冇货交?特别係尼马，佢喺啱啱嘅2场国际赛交出2个入波同3次助攻，「新比利」外号货真价实，佢上场首次正选同美斯合作，即刻产生良好化学作用，只要佢哋再加强默契，入波肯定陆续有来。

　　再者，进攻发电机「小白」日前令人意外拒绝巴塞首次开出嘅新约条件，当地嘅《塞尔电台》话佢唔係介意钱银待遇，反而对管理层有多少意见，不过点都好，要讲数就要有好演出做筹码，今晚西维尔注定冇运行啦!

　　西维尔虽然喺欧霸盃外围赛表现不俗，但查实喺联赛3战先得2分仲未开斋，上仗佢哋主场都只係凭加美路梅开二度逼和马拉加，表现令人失望，睇嚟尼格度同捷西斯拿华斯离队嘅影响都唔细，今仗佢哋喺鲁营抢分嘅机会真係微乎其微。