「FIFA病毒」入侵英超?

　　一般球会嘅教头，对于国际赛赛期多数抱怨连连，无事无干还好，受伤返嚟就真係多得你唔少，传媒就索性称之为「FIFA病毒」。俗语有话「愈穷愈见鬼」，兵工厂相信最有体会，国际赛赛期前阿仙奴本身已有6名伤兵，依家再新加上路斯基、韦舒亚及禾确特3员，伤兵名单几乎可凑够一队。好彩后两者有望赶及今晚作客新特兰，兼且奥斯尔及辛迪卡苏拿都健康归来，阵容不至天残地缺，面对状态、士气均陷低潮嘅「病猫」，兵工厂应可小胜而回。

　　(now622台周六晚10:00直播)

　　尹佩斯食鱼腩结束入球荒

　　同人唔同命，「FIFA病毒」反而暗助红魔鬼。之前硬碰车仔利记，曼联仅得1分，又传出尹佩斯不满莫帅嘅训练方式，负面情绪笼罩球队之时，一个短暂歇息正好等大家冷静同反思，不失为一场「及时雨」。而尹佩斯之前喺英超「强强对碰」陷入入球荒，回归荷兰国家队正好连续遇上鱼腩部队，2场3球重拾入球感觉。当然喺朗尼仍未复出，香川真司确係值得畀机会佢上阵，但人总有偏好，或者莫帅宁可食墨西哥「豌豆」亦唔锺意食日本「寿司」呢?正如洪明甫警告朴主永想打出年世盃就要快离开兵工厂一样，香川真司确係时候谂吓自己喺曼联嘅前途。

　　(now621台周六晚7:45直播)