英超茅王唔识入波

　　为咗迁就周中嘅欧联同欧霸盃，英超今晚得修咸顿主场对韦斯咸一场独脚戏上演。最近韦斯咸劲运滞，安祖卡路尔复操后又重伤，搞到要急急签被富咸放弃嘅柏历顶档，阵容更加立杂，成班球员来自唔同国家鸡同鸭讲，斋计士气默契都输死啦，不如撑修咸顿1.68倍主W好过!

　　(now621台周日晚11:00直播)

　　原本韦斯咸中锋安祖卡路尔已经复操，点知佢隻玻璃脚无啦啦又伤过，最坏情况係要抖到出年5月，即係话今季就咁玩完。同时，「锤仔帮」除咗有中场祖高尔养紧伤，今季新加盟嘅翼锋达宁都未克服伤患，换句话3件英格兰国脚级球星都唔踢得，好似整定韦斯咸要用联合国阵容救亡咁，弊在新签嘅射手柏历几乎冇人要，以佢嘅状态睇怕唔帮得几多。

　　犯规次数最多 进攻最屎

　　仲有，赛前英国传媒计过数，虽然艾拿戴斯以往9次领军喺英超对修咸顿，有3胜6和未输过，不过韦斯咸近15次作客联赛得1胜4和10负，而且唔止係今季英超犯规次数最多球队，仲係传送次数最少(938次)同传送成功率最低(72.3%)，即係话踢人叻过踢波，佢哋喺国际赛前主场以0:1不敌史笃城，更羞家到1次中龙嘅埋门都冇!

　　对家修咸顿喺国际赛期前作客以0:1不敌诺域治，今季首次输波，但射手列基林拔依然得到英格兰国家队信任，连续2场对摩尔多瓦同乌克兰打正选，不过佢自己都明白，下个月朗尼同史杜列治好番，佢就未必有碇企，所以话要用入球说服英格兰领队鹤臣继续用佢，呢场对住进攻数据劲差嘅韦斯咸，好可能係佢嘅最佳表现舞台!

　　乜都玩锦囊 捧埋修咸顿第一队入球

　　「锤仔帮」韦斯咸喺英超作客成绩差到痹，最近15场淨係赢过史笃城，点知上轮联赛主场再斗「脚下败将」，唔单止被对手复仇成功，自己仲要1次中龙射门都冇。最大镬係「锤仔」今季嘅传波断缆比率「冠绝」英超，今场捱打居多，捧修咸顿1.52倍「第一队入球」啱数。

　　Data King 球赛编号：SUN(日)37

　　‧韦斯咸近15场联赛作客录得1胜4和10负劣绩。

　　‧韦斯咸今季传球成功率只得72.3%，係英超最差。

　　‧修咸顿近4次联赛主场斗「锤仔」未输过，成绩为2胜2和。