今晚西甲尾场有贝迪斯迎战华伦西亚，务求借主场之利打开联赛胜利之门!贝迪斯上季以第7名冲过终点，进身欧洲赛，不过佢哋今季季初成绩并唔理想，3战只得1分，今晚虽然有主场之利，亦都冇必胜嘅把握，但对家华伦西亚亦唔好得几多，揭幕战小胜马拉加1:0后连输两场，双方状态都冇保证之下，向入球大埋手较为上算，始终两队近6次对赛开咗5次大，咁好路点可以唔跟先!(now632台周一凌晨3:00直播)

　　近6次对赛5次开大

　　贝迪斯嘅人脚其实一啲都唔曳，除咗鲁宾卡斯度同佐治摩连拿呢啲把握力不俗嘅前锋，中场亦都有好波之人祖安华度派牌，配合速度极高嘅黑人球员施迪克，攻力绝对不容忽视，佢哋季初表现唔好，全因由安东尼奥艾美亚同佐治费古拉斯领导嘅防线，不时出现甩漏，今晚喺主场出击，踢法肯定更进取，后防暴露嘅空位相信更大，呢啲典型嘅「攻强守弱」球队，就最利开入球大喇。

　　普斯迪加大勇

　　华伦西亚嘅问题亦係攻优于守，庄拿斯干卡维斯同班尼加嘅级数固然唔使怀疑，仲有近期「弗」到漏嘅「禁区杀手」普斯迪加，此子近两仗入3粒，仲要3球都极具质素，今晚随时又有士哥!点知后防两位中坚阿尔拉米同列卡度哥斯达，一面对速度型嘅「老鼠仔」就举白旗，对住贝迪斯嘅「高速杀手」施迪克肯定投晒降，入得又失得，呢场入球骚开硬啦!

　　Data King 近10次对赛分出胜负

　　‧贝迪斯近6次主场对华伦西亚全部开出「入球单」。

　　‧双方近10次对碰必分胜负，坐拥主场一方取得7胜3负成绩。

　　‧双方近8次交锋，作客一队未试过半场领先，录得2和6负劣绩。