唔少球员都会喺比赛前讲几句鼓励士气，但就唔会好似CF格兰纳达守将阿伦尼安咁四围辣火头，喺赛前寸尽对手，激起敌人斗心。加上CF格兰纳达几名锋将均受伤患困扰，就算今仗坐拥主场，亦难对季初表现对办嘅爱斯宾奴让波，1.55倍「让客」要撑。

　　(now632台周日晚6:00直播)

　　格兰纳达残阵迎战

　　阿伦尼安赛前话自己队波每个位置嘅人脚都好过对手，明踩对手唔够班，咁样得罪晒爱斯宾奴成队，人哋实同你搏命啦!讽刺嘅係佢笑人冇耐，自己队波就传出坏消息。原定复出嘅中场比迪再次整亲，射手里基、翼锋巴谦美赛前又报称有伤，就算扎住上阵都有所影响，锋线存隐忧。

　　爱斯宾奴开季3战不败，而且喺转会市场关闭前借入乌甸尼斯翼锋加比尔托治。无错，就係上季借去CF格兰纳达嗰位罗马尼亚国脚。佢不满自己今季又被外借，所以一到爱斯宾奴就即刻卖口乖，大讲愿意为球队踢任何位置，又话好恨长时间留队，摆明想高层喺季尾买断自己，今次仲唔讲晒CF格兰纳达所有军情出嚟表示诚意咩。而且经验丰富嘅后衞卡迪维拿复出，有助延续不败场次。